Besøk av brannfolk (04.10.06)
Fredag 29.09. hadde 2. klasse ved Skånevik skule besøk av brannfolka Jørgen og Solveig. Den timen lærte vi mykje om både røykvarslarar og kva vi skal gjere om det startar å brenne der vi er. Dette var ein Jørgen som vi ikkje kunne putte i sekken. Det kan vi nemleg med klassebamsen vår som og heiter Jørgen. Han fekk sjølvsagt vere med han og.

Vi fekk eit hefte med mange kjekke bilder og oppgåver vi kan gjere sjølv seinare, heime eller på skulen. Solveig gjekk gjennom heftet, og vi fekk gjort mykje av det i timen og. Jammen fekk vi ein brannhjelm og. Når timen var slutt, og Jørgen og Solveig gjekk, var kommentaren frå borna: "Skulle ønske dei kom att ein annan gong og". Det må vera bra attest!

Plommeplukkarane i 2. klasse (04.10.06)
Elevane har skrive sjølv om plummeplukking:

Me gjekk opp til Plantefeltet.
Vi plukkte kjempemasse plommer.
Meg og læraren samarbeidde.
Det var 9 kg plommer.
Det var gøy å plukke.
Me fann masse gule plommer. Dei var små.
Eg og ein annan gut fann eit tre med masse plommer på.
Eg og ein annan gut jobba i lag.
Me fann ikkje så mange plommer. Det var vanskeleg å klatre.
Vi elskar plommesyltetøy.

2. klasse

Dans (05.11.06)
I fire veker i september stod dans på programmet i musikk for mellomtrinnet og ungdomstrinnet. Ingebjørg Markhus var instruktør i Swing og det swinga skikkeleg i gymsalen denne tida. Elevane fekk læra seg fleire turar og dei aller fleste synest dette var kjekt å få med seg. Litt skummelt er det jo for dei yngste elevane å danse jente og gut i lag.... men alle overlevde. Takk til Ingebjørg for god innsats!

Sri Lanka-Marknad (05.11.06)
Også i år markerte skulen FN-dagen med open dag på skulen. Torsdag 26. oktober arrangerte 1.-4. klasse Sri Lanka Marknad. Det kom mange på besøk og me fekk inn 7500,- til Forut sitt arbeid. Flott!

Gjennom Forut sin barneaksjon har elevane blitt kjend med Vasana og familien hennar på Sri Lanka. Me har høyrd forteljingar, sunge songar og sett film.

På marknadsdagen var det først litt program der elevane las dikt, song og dansa. Etterpå var det sal av Forut-varer og ting elevane hadde laga sjølv. Dessutan var det lotteri, loppemarknad og kafe.

Pengane me fekk inn går til byggjing og oppussing av barnehagar og senter for barn i Mattakkuliya på Sri Lanka der Vasana bur.

Fjelltur (05.11.06)
  Fredag 15. september var heile skulen på fjelltur. Det var eit nydeleg haustver og berre blide elevar. Dei ulike klassane gjekk litt ulike løyper: 1.-2. klasse gjekk litt oppanfor Valdra, 3.-4. klasse gjekk vidare til Strandahaugane. 5.-9. klasse gjekk Seterveien og nokon gjekk heilt ut til Leknesvatnet. 10. klasse gjekk til Nordfjell. Det var altså elevar i heile Skåneviksfjellet denne dagen!

Engelske tekstar om bygda vår! (12.11.06)

Hausten 2006 har me i 7. klasse i engelsken laga tekstar som handlar om bygda vår.
  Her kan du sjå dei!

Fehussvingen (14.12.06)
Tidlegare i haust var 1. og 2. klasse i saman på tur til Fehussvingen. Her kan de sjå bilete frå turen:

Utstilling (14.12.06)
 Utstillingsskapet i inngangspartiet til skulen er nå fullt av flotte formingsprodukt. Bilda gir eit lite inntrykk av utstillinga akkurat nå, men ta ein tur innom skulen og studer dei flotte elevprodukta. Kanskje noko av det hamnar under juletreet?

Skulegudsteneste (15.12.06)
Fredag 15.desember var heile skulen og barnehagen samla til skulegudsteneste i kyrkja. Det er fleire år sidan alle var samla i ei gudsteneste, og det vart ei koseleg stund. Elevar frå 3. og 4. klasse tende lys, barnehagen og mellomtrinnet deltok med sang, elevar frå 7. - 9. klasse las tekst og to elevar framførte eit stykke på kyrkjeorgelet. Presten las historien "Martin skomaker" med lysbilete til som preik.

Mellomtrinnet framfører "Josefs julevise"

Vinnarar av idrettsskjoldet (21.12.06)
Det var 8. klasse som vart vinnarar av idretsskjoldet som vart utdelt siste dag før jul. I juni hadde me idrettsdag, og utfrå nøye utrekning av dei beste resultata var det 8. klasse som stakk av med sigeren.

9. klasse vann matematikkalender! (18.01.07)
Ungdomsskulen hadde i desember ein lokal kalenderkonkurranse i matematikk. Kvar dag vart det servert ei ny matematikknøtt som dei skulle prøva å løysa. I 9. klasse løyste alle elevane i klassen desse og vart lokale vinnarar, og premien vart ein tur på Larsen.

Men 9. klasse nøya seg ikkje med det! Dei sende inn resultata til www.matematikk.org og vart ein av 4 ungdomsskuleklassar i landet som vann. Premien her var matematisk utstyr til skulen for kr 2000,-! Gratulera!

Rikskonsert for 1.-7. klasse (18.01.07)
  I dag var det rikskonsert for elevane i 1.-7. klasse. Musikarane Carl Petter Opsahl og Åsmund Reistad var på besøk, og engasjerte elevane med "Musikk frå ein blå dal". 

 Endeleg kom snøen! (24.01.07)
Langt ute i januar kom endeleg snøen som me alle hadde venta på. Akebakken har blitt mykje brukt dei siste dagane, og det er mange blide ungar ute i friminutta. Bilda nedanfor er frå tysdag, då 1., 5. og 6. klasse kosa seg ute i snøen.

Server (15.02.07)
  Me har laga forliset ved Fedje. Det blåste storm og båten gjekk på grunn. Den knekte i to og olja rann ut. Det regna og var masse vind. Men alle folka på båten vart redda. Det var masse olje på sjøen. Men mange fuglar fekk olje på seg. Då kan dei dø. Nå er det mange som ryddar og prøver å hjelpa fuglane. Me håpar at det går bra.

Helsing 2. klasse

Åsatjødna (15.02.07)

Måndag var me på isen og skøyta i lag med 1. klasse. Det var kjempegøy. Me grilla pølse og pinnebrød. Så fekk me boller som Judith hadde laga. Dei var veldig gode. Alle i klassen prøvde skøytene. Me kan gå på skøyter for me gjekk på Vatndal i fjor. Me hadde med oss varm drikke, kakao, te og saft. Dagen etterpå hadde me berre litt gangsperr. Me vil ha meir is!!

Hesling 2. klasse

Matematikkens dag 2007 (15.02.07)
Torsdag 8. februar arrangerte skulen den årvisse "Matematikkens dag". Heile skulen arbeida med matematikk heile dagen på ulike måtar. Mellomtrinnet og ungdomstrinnet var innom problemløysing, spel og geometri. Elevane var delte i aldersblanda grupper, og det heile var lagt opp som ein konkurranse. Småskulen hadde og aldersblanda grupper og arbeidde med spel og problemløysingsoppgåver. Det var stor iver og mykje aktivitet!
Sjå album!

Vinnargruppa ungdomstrinnet

Vinnargruppa mellomtrinnet

 Valentinsball (16.02.07)
9. februar blei det arrangert Valentines ball for 7., 8., 9. og 10. klasse på Skånevik skule. Det var rundt 30 ungdommar som kom for å dansa og kosa seg denne kalde fredagskvelden.Gymsalen var blitt omgjort til eit romantisk festlokale, pynta med hjerter og raud løpar.

Først vart det servert grandiosapizza, før me tok til med swingkonkurransen! Dommarane var vaktene som hadde stilt opp for kvelden, Ingebjørg og Osvald. (kl 10 kom Tove og Sølvi og bytta med dei). Det talentfulle paret som vann, var Annette og Aleksander, som begge går i 7. klasse. Det blei også arrangert Singstar-konkurranse, som Johanne og Marthe frå 10. kl vann.

Ballets konge og dronning blei Martin Skram Løhaugen og Charlotte Ytrenes Aastvedt, som begge fortente tittelen! Dei mottok både ei krone og rose kvar, og fekk dansa saman ved slutten av kvelden.

Kvelden var ein knallsuksess, og me trur dei fleste som møtte opp fekk svingt seg skikkelig!

- 10. klasse -

Vinnarar av dansekonkurransen

 Minotaur (02.03.07)
6. februar fekk elevane i 8.-10. klasse ei spesiell oppleving. Dei to kunstnarane Gitte Bastiansen (dansar) og Mariano Pignatiello (biletmålar) kom og hadde eit scenekunstprosjekt med inspirasjon frå myta om Minotaurus. Etter førestellinga var det workshop der elevane sjølv fekk danse og måle.

Vikinggarden på Bukkøy (16.03.07)
Tysdag 14. mars var 5.-7. klasse ved Skånevik skule saman med Fjæra skule til Bukkøy på Avaldsnes for å læra om vikingane. Ein heil dag fekk elevane vera vikingar.

Her kan du lese nokon av elevane sine forteljingar frå turen.

Skidag for heile skulen (28.03.07)
Tysdag 27. mars var heile skulen til fjells for å stå på ski. Ei gruppe reiste til Hordadalen, medan størstedelen var på Seljestad. Det var eit strålande finte ver, og ein nydeleg tur!

Hoppetaukonkurranse (12.04.07)
I veke 16 og 17 skal elevane i 3.-7. klasse hoppa tau til den store gullmedalje. Dei er med i ein konkurranse som Nasjonalforeningen for folkehelsen arrangerer. Kvar elev samlar poeng til klassen sin ved å hoppa i friminuttane, og av og til i timane om dei får lov. Å hoppa tau er godt for kroppen og hjarta, og er veldig kjekt!

UKM (16.04.07)
I helga var det fylkesmønstring i Bergen, og 3 av skulen sine elevar deltok. Linn og Caroline deltok med 4-hendig piano: "Minuett i G" av J. S. Bach og Leo Andre dansa breakdance.

Sjå fleire bilete og video

 

Vår! (27.04.06)
Det nydelege vårveret lokka mange av elevane ut på slutten av dagen i dag. Det var stor aktivitet med hopping, klatring og leik.

Kassabilar (28.05.07)
8. klasse held på og lagar 3 kassabilar. Dei skal vera klar til kassabilløpet på torgdagane.

Bedriftsbesøk (28.05.07)
I heile dette skuleåret har 1. klasse vore rundt på mange av foreldra sine arbeidsplassar. På den måten blei me kjend med bygda vår. Nokon har allereie bestemt seg for å bli gravemaskinkøyrarar når dei blir store... Her ser de bilete frå der dei har vore:

Barnehagen April-07	Bøthun Nov-06	Fiskeoppdrettet April-07
Hotellet Des-06	Johansen Rør Mai-07	Mars-07
Sjukeheimen Feb-07	SMV mars07	Skånevikstrand Maskinstasjon Mai-07

Teknologi og Design (28.05.07)
Torsdag 24. mai hadde skulen besøk av Dagfinn Aksnes. Han har drive ein del prosjekt med Teknologi og Design for elevar. Dette fortalde han om for elevane i 7.-9. klasse ved skulen. Etterpå var det brubyggjing med spaghetti! I neste veke skal elevane prøva å nytta plast som byggjemateriale.

Animasjonsverkstad (28.05.07)
I mars var 8.-10. klasse i Etne og fekk lære ein del om animasjon. Dei fekk og høve til å prøve ulike teknikkar.

17. mai feiring i flott vårver (28.05.07)
 17. mai vart i år feire i og ved idrettshallen. Derfor fekk toget ein ekstra lang veg. Men skuleborna var flinke til å gå fint og laga liv. I år var det 10. klasse som vann pokalen for å ha gått finast i toget.
 

"Eg byggjer meg ein båt" (15.06.07)
Fredag 25. mai fekk elevane i 6. og 7. klasse læra litt om korleis ein færing vert til då skulen hadde besøk av Bjørn Arve Lunde og Johanne Øvstebø Tvedten frå Sunnhordland Museum. Dei hadde med seg ein halvferdig færing i halv storleik. Gjennom forteljing og aktivitetar fekk elevane  lære kva verktøy og tekinkkar ein brukar, og kjennskap til ein del uttrykk frå båtbyggjartradisjonen.

Elevane vart delt på tre stasjonar. På den eine stasjonen skulle dei spikke ein trepinne rund og på den andre bora dei hol i denne og klinka i ein koparnagle. På den tredje stasjonen fekk dei prøva seg som båtbyggjarar med å setje saman byggjesettet av ein færing.

Vann redningsvestar! (18.06.07)

Redningsselskapet inviterte 1. og 2. klassingar i heile landet til å  illustrera Elias-reglane. 401 skular med til saman 654 klassar og 9554 elevar deltok i konkurransen. Illustrasjonar i form av legolandskap, video, foto, tekstilarbeid, collager, maleri og teikningar har kome inn til Redningsselskapet i store mengder.  

Me i 2. klasse ved Skånevik skule lagde ein teiknefilm og var ein av dei heldige klassane som vann! Me vil ønskje alle kjende ein god sommar, og bruk redningsvest!

Kyrkjesteinen (22.06.07)
I byrjinga av juni var 5. klasse på klassetur til Kyrkjesteinen. Det var ein flott tur i strålande ver!

Kyrkjesteinen Vår-07

Rettferdig handel? (22.06.07)
Ingrid Birkenes har skrive ein god artikkel om rettferdig handel:
"Rettferd, kva er det eigentleg? Og finst det mest rettferd eller urettferd her i verda? Det er i alle fall lett å sjå mykje som er urett! Det finst små ting i livet som kan virka feil for oss, som f.eks. forskjellige fordelar nokre har; å vera mest attraktiv eller mest sosial til dømes. Så finst det også dei litt større tinga; som å vera født inn i ein rik eller i det minste trygg familie, i motsetnad til å vera fødd inn i ein alkoholisert og oppsplitta heim. Eg vil i alle fall seia at det er urettferdig i forhold til den med ulempa. Det er jo til sjuande og sist ikkje nokon sin feil, det er berre, ja, nettopp urettferdig
(...)
Difor har eg i denne artikkelen valt å fortelja dykk litt om ein organisasjon som faktisk har tatt steget vidare, og gjort noko med ein liten del av problemet fattigdom. Den har i tillegg gjort det både enkelt, og til og med lønsamt for alle normale folk i rike land og hjelpa til. Organisasjonen heiter Fairtrade Max Havelaar."
Les heile artikkelen

Skånevik skule med vinnarfalks! (22.06.07)
Ved å sende inn resultata frå svømmeundervisninga dette skuleåret vart skulen med i ei trekning som Norges Svømmeforbund arrangerer. Skånevik skule var ein av tre skular som blei trekt ut og vann gåvekort på kr 5000,- hos Klubben AS. For desse pengane blir det kjøpt inn mykje kjekke uteleiker og utstyr til kroppsøving for dei yngste.

10. klasse takka for seg (22.06.07)
 Torsdag kveld hadde 10. klasse sin avslutningsfest. Det vart servert mykje god mat, me fekk sjå bilete frå Londonturen og video frå dei gjekk i 1.-7. klasse. Dei hadde og skrive ein eigen song der dei oppsummerte tida si her på skulen på ein humoristisk måte. Tidlegare lærarar "talte" og kom med mange lovord om denne gjengen som nå avsluttar si tid her på skulen. Det heile vart avslutta med at rektor delte ut vitnemåla.

Bilder frå skuleåret 06/07: