GOD SOMMAR! (18.06.10)
  Finvêret er på plass og ferien står for døra. Fredag 18. juni er siste skuledag. Då sluttar elevane kl 11.00 og skulebussen går umiddelbart etterpå. Ikkje alle detaljane er på plass for neste skuleår. Ein del nytilsettingar frå hausten gjer at ein treng litt meir tid for å få kabalen/timeplanen på plass. For dei fleste er det inga endring når det gjeld kontaktlærar.

Nytilsette er:
Åse Hjelmervik, Linda Helgeland, Theresa Hereide, Anne Gunvor Ness Nedreskår.  Me ynskjer dei velkommen til skulen og håpar dei vil trivast i kollegiet, med elevar og føresette..

Elise Dørheim går av med pensjon etter mange år ved skulen. Me takkar Elise for hennes innsats og ynskjer henne lukke til i åra som kjem.

BALLBINGEN
Ballbingen på skulen er eit flott aktivitetstilbod i skule- og fritid. Håpar at den blir mykje brukt i ferien. Det er ein presisering: Den må ikkje brukast mellom kl 23.00 og 08.00.

Då er den stengt. Ballane som treff ballveggen lagar kraftig lyd og naboar har blitt forstyrra nattetid av aktivitet i ballbingen. Fint om ein tek opp dette med ungdomane som er seinare oppe sommarkveldane/nettene. Både dei som overnattar på hotellet og som bur i nærleiken har krav på nattero.

Første skuledag etter ferien er onsdag 18. august for 5. – 10.kl. og torsdag 19. for 1. – 4.kl.

Då vil underteikna på vegne av personalet ynskja alle ein  god ferie og takka for samarbeidet dette skuleåret.

Med helsing

Kjell Ingvald Matre

Rektor Skånevik skule

To frå Skånevik (03.11.09)

   Liv Marit Gordon har eit stort talent som songar.  Ved siden av m. a. jobben som reinhaldar ved skulen vår har ho gitt ut fleire CD ar.  Her fremfører ho songen MESTEREN saman med flotte bilete frå Skånevikstranda tatt av broren Orvill Åkra.  Sjå og høyr meir

Skulearket desember 2008 (04.12.08) 
  Me er inne i adventstida, noko som sjølvsagt vil prega dei siste vekene av semesteret.   Det er viktig å bruka tid i klassane til aktivitetar som skapar forventning og set oss i julestemning.

Litt om det som skjer framover:  
Laurdag 6: Elevane er blitt utfordra av bluesbygd prosjektet til å vera med å forvandla Peparen til ei juleøy. Dette har vore eit spennande arbeid. Resultatet vil ein kunna sjå laurdag 6. desember kl 14.00. Då vil ordføraren opna juleøya.

Tysdag 16.
  Det er blitt ein tradisjon at FAU/foreldre serverar graut til elevane og personale i siste veka før jul. Normalt skjer dette i skuletida. I år vil me prøva å gjera dette på ein annan måte. Det er gjort ein stor jobb med å gjera peparen om til juleøy og då er det viktig at den og blir brukt. FAU og skulen har derfor blitt einig i at grauten i år skal serverast på juleøya Peparen tysdag 16.  kl 18.00. Me må sjølvsagt ta atterhald om veret. Grautsamlinga kan derfor bli flytta til måndag 15. eller bli gjennomført på skulen. Me ynskjer at denne samlinga skal bli ei familiesamling slik at alle som ynskjer kan bli med (ikkje obligatorisk frammøte). Elevane betalar kr 20, familiemedlemer utanom elevane betalar kr 30,- for grauten. Alle må ta med tallerk, skei og kopp. FAU vil gjennomføra ei lita utlodding eller ein tippekonkurranse som kan gi inntekt til FAU. Ta derfor litt ekstra mynt med.

Det er viktig at føresette er med og har ansvar for borna/elevane. I mørke vil det vera umuleg for lærarane å ha tilsyn med alle elevane, sjølv om øya er opplyst.

Onsdag 17: Volleyballturnering for u-steget frå kl. 11.30

Torsdag 18. Kl. 18.00 er det den årlege juletrefesten for 1. – 7. kl. Elevane lagar programmet.   FAU arrangerar festen og foreldre er sjølvsagt velkommen. Spesielt velkomne er elevane som nett skreiv seg inn på skulen. Det er viktig for å bygga opp den gode julestemninga at ein tek seg tid til å vera med i desse førjulsaktivitetane 

Fredag 19: Skulegudsteneste. Alle elevane og barnehagen har felles gudsteneste kl 10.00 Elevar kjem til å bidra med song, opplesing m.m. og foreldre som har lyst til å vera til stades er velkommen. Denne dagen sluttar elevane kl 11.00. For dei som har avtale om SFO, så startar den kl 11 og stenger kl 14.15

Første skuledag etter nyttår er måndag 5. januar Me har ikkje skulemjølk denne dagen, så dei som treng drikke må ta det med.

Underteikna og personalet på skulen vil ynskja alle heimane ei riktig god adventstid og jule-/nyttårshelg.

Helsing Kjell Ingvald

Skånevik skule vinnarar! (26.02.08)
Førre skuleår sende både årets 2. og 6. klassingar inn eit bidrag til "Mitt tre"-konkurransen i NRK sitt program "Naturens verden". 2. klasse hadde målt dei store trea like utanfor skulen, medan 6. klasse var i Vannes og målte dei store eikene der. Like før jul vart det lese opp i radioen at Skånevik skule kom på 2. plass i konkurransen for skular, kjempeflott! Premien var bøker til skulen, og caps og t-skjorte til alle elevane! Rett før vinterferien var det premieutdeling, er me ikkje flotte vel?

Skulearket desember 2007 (08.12.07)
Me er inne i adventstida, noko som sjølvsagt vil prega dei siste vekene av dette semesteret. Det er viktig å bruka tid i klassane til aktivitetar som skapar forventning og set oss i julestemning.

Litt om det som skjer framover:

Tysdag 18.: FAU(saman med elevar i 9. kl) lagar graut til alle elevane. Elevane må hugsa å ta med djup tallerk, skei og kopp. Elevane tek og med kr 20,- til graut. Gratumåltida vert fordelt omlag slik:
Kl 10.30: 1.-3. kl    kl 10.45: 4.-7. kl    kl 11.30: U-steget

Onsdag 19.: Volleyballturnering for U-steget frå kl 11.30

Torsdag 20.: KI 18.00 er det den årlege juletrefesten for 1.-7. kl. Elevane lagar programmet. FAU arrangerar festen og foreldre er sjølvsagt velkommen. Spesielt velkomne er elevane som nett skreiv seg inn på skulen. Det er viktig for å byggja opp den gode julestemninga at ein tek seg tid til å vera med i desse førjulsaktivitetane.

Fredag 21.: Skulegudsteneste. Alle elevane og barnehagen har felles gudsteneste kl 10.00. Elevar kjem til å bidra med song, opplesing m.m. og foreldre som har lyst til å vera til stades er velkommen. Denne dagen sluttar elevane kl 11.00. For dei som har avtale om SFO startar den kl 11.00 og stenger kl 14.15.

Første skuledag etter nyttår er torsdag 3. januar.

Leksehjelp:
Frivilligsentralengår ut med tilbod om leksehjelp ein dag (ettermiddag) i veka til elevar som ynskjer eit slikt tilbod. Dersom nokon vil nytta tilbodet kan dei ta kontakt med underteikna. Dette tilbodet har vore gitt på Enge skule i haust og har fungert bra.

Heimesida:
Me er ikkje alltid like flinke til å oppdatera og leggja inn nytt stoff på heimesida vår. Me prøver heile tida å betra oss. Nå er sida oppdatert og det er ein del nytt stoff lagt ut. Ta ein kikk på sida og kom gjerne med innspel til oss. Me legg ut bilete av elevar, men unngår å leggja ut namn. Dersom nokon føresette ikkje ynskjer bileta av sine born på heimesida, må dei ta kontakt med meg.

Underteikna og personalet på skulen vil ynskja alle heimane ei riktig god adventstid og jule-/nyttårshelg.

Helsing Kjell Ingvald

Skulearket desember 2006 (21.12.06)
Sjølv om temperaturen er rundt 10 grader og me snart regnar bort, viser kalenderen desember og aktivitetane på skulen er prega av at det snart er jul. Halvåret har gått fort og me ser attende på eit semester som har vore prega av positivt samarbeid på alle område.

Fredag 15: Skulegudsteneste. Alle elevane og barnehagen har felles gudsteneste kl 11.30. Elevar kjem til å bidra med song, opplesing m.m. og foreldre som har lyst til å vera til stades er velkommen.

Måndag 18:Kl. 18.00 er det den årlege juletrefesten for 1. – 7. kl. Elevane lagar programmet. FAU arrangerar festen og foreldre er sjølvsagt velkommen. Det er viktig for å bygga opp den gode julestemninga at ein tek seg tid til å vera med i desse førejuleaktivitetane 

Tysdag 19: FAU lagar graut til alle elevane. Elevane må hugsa å ta med djup tallerk, skei og kopp. Elevane tek og med kr 20,- til graut (samlar inn på skulen)

Onsdag 20: Volleyballturnering for u-steget frå kl. 11.30

Torsdag 21. er siste skuledag før jul. Elevane har då undervisning fram til kl 11.00 og skulebussen vert framskunda til dette tidspunktet.

Første skuledag etter nyttår er onsdag 3. januar for 5. – 10.kl og torsdag 4.januar for 1. – 4.kl.

Leksehjelp: Frivillighetssentralen går ut med tilbod om leksehjelp ein dag (ettermiddag) i veka til elevar som ynskjer eit slikt tilbod. Dersom nokon vil nytta tilbodet kan dei ta kontakt med leiar i Frivillighetssentralen Ole Funderud eller underteikna. Elevar som tilbodet kan gis til er avgreinsa ut frå talet vaksne leksehjelparar som kan vera med. 

Underteikna og personalet på skulen vil ynskja alle heimane ei riktig god jule- og nyttårshelg.

Helsing Kjell Ingvald

Ei flott fantasy-forteljing (30.11.06)
  Den kulturelle skulesekken i Hordaland har lagt ut forteljinga ”Furte & Bistene” av Stine Sandvold og Ingrid Birkenes på heimesida si. Forteljinga er ei av tre forteljingar som DKS brukar for å syna korleis elevane har gitt respons etter besøk av forfattaren Rolf Enger.

Den kulturelle skulesekken legg til rette ulike tilbod for elvane i grunnskulen, det gjeld konsertar, forfattarbesøk, revyar og andre kulturelle opplevingar.

Det var i vår at skulen hadde vitjing av forfattaren Rolf Enger med emnet ”Møt Hobbiten og skriv fantasy”. Han gav elevane ei innføring i korleis ein skriv fantasy-forteljingar. Elevane vart invitert til å skriva forteljingar og senda til Rolf Enger.  Dette vart gjort, og me fekk ei vurdering av dei innsende produkta saman med eit spørsmål frå fylkesbiblioteket om å få leggja "Furte & Bistene" ut på DKS si internettside.

Underteikna vil gi ros til Stine og Ingrid for ei fantasifull og flott forteljing.   
Rektor

Skulearket oktober 06 (06.10.06)
Til heimane!
  Tida går fort og det er ikkje lenge før haustferie. Dei fleste klassane har hatt foreldremøte og eg vonar at samarbeidet om klassane og elevane er godt i gong. Foreldrerådet og SU har ikkje hatt møte så langt i år, men eg håpar å få til møte her like etter haustferien.

Det har vore mykje fint ver til nå og elevane hadde ein fin fjelltur fredag 15.sept.   Eg trur at det vart tatt nokre bilete frå fjellturen som kan leggast ut på heimesida.

Me har eit ønske om at heimesida til skulen skal gi foreldre og andre interesserte eit bilde av korleis me har det på skulen og sjølvsagt anna nyttig informasjon.  Men for at det skal bli slik er det viktig at me på skulen er flinke til å legga ut stoff og oppdatera heimesida. Her har me ei utfordring og me må bli flinkare. Gi oss gjerne tips om informasjon som de som foreldre saknar.

KUNNSKAPSLØFTET
Kunnskapsløftet er ei av dei viktige utfordringane  på vår skule som på alle skular i landet dette skuleåret. Det er sendt heim eit lite informasjonshefte frå Kunnskapsdepartementet som gir ei lita orientering om kva som er nytt i kunnskapsløftet. Sjølv vil eg understreka dette i den nye læreplanen:

• Større fokus på kunnskap. Det er ei oppgåve for alle å gi kunnskap status, at det er viktig for borna si framtid. Dette kan foreldre delta i med å visa borna sitt skulearbeid merksemd, ta tid til å sjå på arbeidet deira og gi hjelp om det trengs. Foreldre kan og motivera elevane for skulen og skulearbeid ved å omtala skulen positivt.  
• Dei nye læreplanane har tydelege mål for kva elevane skal meistra på ulike trinn.. Kvar enkelt elev skal stimulerast til størst mogeleg måloppnåing gjennom tilpassa opplæring. Varierte arbeidsmåtar er eit verktøy i denne samanheng.
• Sentralt vert det og for skulen å gi elevar og foreldre ei god vurdering/tilbakemelding på korleis eleven utviklar seg i høve kompetansemåla og føresetnaden deira.
• Meir vektlegging av lese- og skriveopplæring i 1.kl.

FYSISK AKTIVITET OG HELSE
  Ei av satsingsområda til skulen dette året er fysisk aktivitet og helse. Me vil i størst mogeleg grad stimulera til fysisk aktivitet  og til eit sunt kosthald. Oppfordrar derfor alle til å eta sunne matpakkar og frukt dagleg. Helsesøstera har fast tid på skulen annakvar tysdag frå kl.11.00 til 12.30. Då kan elevar få høve til å snakka med henne om tilhøve dei er opptatt av innan eiga helse og trivsel.

18. oktober har Miljøagentene (som er Noregs ledande miljøvernorganisasjon for barn) invitert alle Noregs barneskuleelevar til å ta beina fatt til skulen. Me oppfordrar derfor alle elevar som ikkje har farleg skuleveg om å gå eller sykla til skulen. Denne dagen vil dette verta registrert i klassane og sendt inn til Miljøagentane. Ein klasse i landet vil verta trekt ut og få ein premie. Samtidig er det ein klar oppfordring til at borna går meir og at foreldra til vanleg ikkje køyrer dei til skulen.

Til sist vil eg ynskja alle ein fin haustferie når den kjem til helga. Håpar mange kan få nytta den ute i skog og mark.

Helsing Kjell Ingvald

Skulearket juni 06 (19.06.06)
  Så er det alt slutt på dette skuleåret og, - det går så utruleg fort. Me kan sjå tilbake på eit godt skuleår/semester og skulen vil takka føresette og elevar for godt samarbeid. Elevrådet har synt stort engasjement for at alle elvane skal ha det godt og tok derfor initiativ til mobbekontraktar. Me veit at det har vært situasjonar som me kunne vært forutan, men saman har me klart å få til gode løysingar og ei positiv utvikling.

I mai hadde skulen vitjing av skuleleiarar frå 11 land i Europa. Dei ville gjerne sjå skulen og høyra korleis skulen og det lokale næringslivet  samarbeida. Lars Hovda fortalde om korleis SMV kunne dra nytte av eit slikt samarbeid og elevar i 9.kl. fortalde om arbeidsvekene og ulike prosjekt/oppgåver dei og andre elevar har utført for næringslivet. All kommunikasjon gjekk på engelsk og elevane gjorde ein kjempeflott innsats.

Mange av klassane har vært på flotte turar i det siste, m.a. til Oppheim, Seteren, Blomstølen, Eintveit, Stordalsvatnet, Kvinnherad og Sandvik. Ein del føresette har vært med og veret har stort sett vore kjempebra. Det er flott når elevane kan få slike positive opplevingar i naturen.

På tysdag skal 1. – 4. kl. delta i skulegudsteneste  saman med barnehagen. Dette skjer i barnehagen sitt uteområde. 5. –10.kl. skal ha skulegudsteneste på onsdag kl. 10.00 og vert veret bra vil det skje på bakken ved skuleplassen.   Onsdag vil skulebussen gå kl. 11.00

NESTE ÅR
Skulen startar opp att etter ferien måndag 21. august kl .08.30. SFO vil vera i drift same dagen Dei i 2. – 4. kl. som ikkje har sagt opp plassen og dei nye som har søkt plass kan då nytta tilbodet.   Svein Ketil Løhaugen kjem neste år til å forlata oss og vert overført til Enge skule.

Me takkar han for flott innsats desse to åra han har vært her og ynskjer han lukke til på Enge. Store endringar vert det elles ikkje neste år. Annlaug Sævareid vert kontaktlærar for 1.kl., Olaug Sævereid for 2.kl, Eli Garvik for både 3.kl og 4.kl..og Paul Tungesvik vert kontaktlærar for 7.kl. Dei andre klassekontaktane held fram med klassane dei har hatt i år.

PÅMINNINGAR
Hugs å levera inn bøker som høyrer til biblioteket. Lever og inn alle lærebøkene slik at skulen får oversikt over kva ein har og om ein må gjera innkjøp.   Eg vil og minna om heimesida til skulen: http://www.etne.kommune.no/skaanevik-skule/   Her kan ein sjå bilete frå aktivitetar i skulekvardagen og få informasjon frå skulen. Målet vårt er å verta enda flinkare til å oppdatera heimesida med informasjon frå skulen. Ny læreplan skal takast i bruk til hausten og i samband med dette vil det nok koma noko informasjon.

Til sist vil eg på vegne av personalet på skulen ynskja elevar og føresette ein god ferie.  

Helsing Kjell Ingvald  

Matematikknøtter - løysingar og vinnarar (07.01.06)

Nøtt 1 - Bamsemums:
Anne, Bente og Cecilie skal fordela 6 bamsemumsar mellom seg. I staden for å dela likt begynner jentene å diskutera kor mange ulike fordelingar det kan bli med 6 bamsemums og tre jenter. Det sjølvsagt forskjell på om for eksempel Anne får 1 bamsemums eller om det er Bente som får 1 bamsemums.
Kor mange ulike måtar kan dei fordela bamsemumsane på?

Alle skal ha minst ein bamsemums kvar, og det er ikkje lov å dela nokon bamsemums opp i mindre bitar.

Rett svar: 1-1-4, 1-2-3, 1-3-2, 1-4-1, 2-1-3, 2-2-2, 2-3-1, 3-1-2, 3-2-1, 4-1-1 = 10 ulike måtar

Nøtt 2 - Nesten jenteklasse:
I 9. klasse på Øvrebø skule går det 99 jenter og 1 gut. Alle saman er samla i gymsalen. Kor mange jenter må forlata gymsalen for at det skal bli 98% jenter igjen i salen?

Rett svar: 50 jenter må forlata salen, slik at det er 49 jenter og 1 gut igjen!

Vår 2005:

Summen av tre heile tal som kjem etter kvarandre, er 171.
Kva for tre tal er det?

Rett svar: 56, 57 og 58

Hege og Line fekk 10 rette i tipping og vann 330 kr. Hege hadde betalt 24 kr og Line 12 kr. Korleis vil du fordela premien rettferdig mellom dei?
 

Rett svar:Line får 1/3 av premien, altså 110 kr og Hege får 2/3 av premien, altså 220 kr.

Julenøtt 2004:

Kva blir dei to neste tala i desse rekkene:

a) 1  5  6  12  24  ?  ?

b) 1  8  22  43  ?  ?

Rett svar: a) 48, 96 (du legg saman alle tala tidlegare i rekka)
b)  71, 106 (du legg til 7, 14, 21, 28 osv. i 7-gangen)
 

På ein klassefest er det 18 elevar og til saman et dei 43 pølser. Nokon et 2 pølser og nokon et 3 pølser. Kor mange et 2 pølser og kor mange et tre pølser? 

Rett svar: 11 stk åt 2 pølser og 7 stk åt 3 pølser.

Mai-04:

Stine, Olav, Nils og Katrine er søsken. 
Ingen av dei er tvillingar.
Olav er ikkje eldst.
Stine er yngre enn Katrine.
Nils er født før Katrine.
Olav er eldre enn begge søstrene sine.
Skriv ned rekkjefølgja på søskena etter alder. Start med den yngste.

Rett svar: Stine, Katrine, Olav, Nils

Mars-04:

Rett svar: 30 klossar.

Januar-04:

Lag eit reknestykke med siffera: 1, 2, 3, 4 og 5 med pluss- eller minusteikn slik at svaret blir 111. Pass på at du bruker kvart siffer berre ein gong.
 

Rett svar:
153 - 42 = 111     135 - 24 = 111

Skulearket desember 05 (13.12.05)
  Eit semester går fort, me inne i adventstida og mange ser fram til juleferien. Klassane er i gang med juleverkstad og anna aktivitet som høyrer jula til. For ei tid tilbake hadde skulen ei trivselsundersøking mellom elevane.

Dei fleste elevane har det godt, MEN IKKJE ALLE. Nokre elevar trivs ikkje fordi dei vert plaga på skulen og eller i fritida. Dette er ei utfordring for elevane, dei tilsette og foreldre.

Mange born har ein røff måte å vera på over for kvarandre som ikkje alle taklar og som skapar mistrivsel. Elevrådet og personalet vil drøfta kva ein kan gjera for at alle skal ha det godt.

Det er og viktig at foreldre saman med sine born brukar tid på å snakka  om korleis ein kan ta vare på kvarandre og skapa trivsel. Kanskje juleferien og jula sitt innhald kan vera eit godt høve til å gi dette temaet merksemd.

Litt om det som skjer framover:
Onsdag 14: Juleverkstad for 5. – 7.kl.
Torsdag 15: Juleverkstad for 1. – 4.kl.
Fredag 16: Skulegudsteneste. 1. – 4.kl. kl.10.00 og 5. – 10.kl. kl.11.30. Elevar kjem til å bidra med song, opplesing m.m. og foreldre som har lyst til å vera til stades er velkommen.

Måndag 19:
Ungdomssteget har volleyball turnering.
Kl. 18.00 er det den årlege juletrefesten for 1. – 7. kl. Elevane lagar programmet. FAU arrangerar festen og foreldre er sjølvsagt velkommen.

Det er viktig for å bygga opp den gode julestemninga at ein tek seg tid til å vera med i desse førejuleaktivitetane 

Tysdag 20: FAU lagar graut til alle elevane. Elevane må hugsa å ta med djup tallerk, skei og kopp.  Tysdag er siste dag for småskulen og dei sluttar til normal tid.

Onsdag 21. er siste skuledag for 5. – 10.kl. Dei har då skule fram til kl 11.00 og skulebussen køyrer då elevane heim.

Underteikna og personalet på skulen vil ynskja alle heimane ei riktig god jule- og nyttårshelg.
Helsing Kjell Ingvald

Utstilling av formingsprodukt (07.12.05)
  Underteikna vil gjera merksam på utstillinga i glasmonteren ved hovudinngangen til skulen.   Her er mange flotte formingsprodukt i keramikk, tre, tekstil og teikning. Bildet gir eit lite inntrykk av utstillinga akkurat nå, men ta ein tur innom skulen og studer dei flotte elevprodukta.
Rektor

Elevar i 9.kl. har laga skuleavis! (29.11.05)
  Avis er tema i fagplanen for 9.kl. og elevane har like godt tatt utfordringa å laga ei avis som nå er klar som papirutgåve og nettutgåve på skulen si heimeside. Avisa har fått namnet Skånoposten!

Med hjelp frå organisasjonen ”Avis i skulen” og vitjing med gode råd frå Haugesunds Avis har elevane gjort eit flott arbeid som eg håpar folk i og utanfor Skånevik vil setja pris på. Elevane har fordelt arbeid og ansvar slik ein gjer i ein redaksjon, skrive reportasjar, fotografert, henta inn annonser m.m.

Gjennomgangstema i avisa er yrke og arbeidsliv, men avisa har og nokre andre reportasjar.

Kanskje kan denne avisutgåva verta starten på ein tradisjon, ei avis laga av 9.kl. kvart år.   Til 9.kl. – gratulerar med avisa!   Til lesarane – kos dykk med ei elevprodusert avis!

Helsing
rektor

Linn S. Jespersen vann teiknekonkurransen 2005 (26.10.05)
  ”Ditt distrikt blir i desse dagar distribuert til alle husstandar og bedrifter i Etne, Sauda, Suldal, Vindafjord og Ølen. Det er Linn S. Jespersen frå Skånevik skule i Etne kommune som har teikna framsida på katalogen.

  Den 21. oktober kunne juryleiar Reidun Amundsen utropa Linn S. Jespersen til vinnar av teiknekonkurransen om framsida på lokalkatalogen Ditt Distrikt i Etne, Sauda, Suldal, Vindafjord og Ølen. Til saman kom det inn 72 teikningar.   Linn vann fotoapparat og eit diplom, og ho har sjølvsagt fått vinnarteikninga si på framsida av Ditt Distrikt. I tillegg har heile klassen fått 2000 kroner som kan brukast i samråd med læraren.

Oppgåveteksten for årets teiknekonkurranse er ”Teikn kvardagshelten din” (”idolet” ditt der du bur). Gjennom dette temaet ynskjer Ditt Distrikt å engasjera borna til å teikna sitt idol, helt, førebilete, eller ein dei beundrar.”

  Dette skriv Ditt Distrikt i si pressemelding.

- Me gratulerar Linn med den flotte prestasjonen og premien til både henne og klassen.   Det er akkurat 5 år sidan Skånevik skule vann teikninga til framsida på Ditt Distrikt. Då var det Ingrid Olsen som vann. Håpar dette kan verta ein god tradisjon- 

Frå Skulearket nov. 04 (23.11.04)

Kom og bli med til eventyrland… Mellomtrinnet har laga eit fint program med lokale segner og kjente eventyr. Dette vil dei visa i gymsalen tysdag 23. nov kl. 19.00 Med dette er du invitert. Det vert sal av kaffi og kaker i pausen.

På programmet elles….   
1.nov.:  Innskriving av nye 1.klassingar 
6. – 9. des: Tentamen for u-skulen 
17. des: skulegudsteneste  
Dette er det som er tidfesta så langt. Kjem med meir info om ting som skal skje i adventstida seinare.

Då ynskjer eg alle ei fin adventstid!  
Ta kontakt med skulen om det er noko du lurer på.  
Helsing Kjell Ingvald    

Brukarundersøking i skulen (11.11.04)
  Vi har sett i gang eit prosjekt for å skape betre kvalitet i skolen. Då er det viktig for oss å vite korleis du som føresett opplever tilbodet.   Difor har vi laga ei brukarundersøking for foreldre til elevar i 5. til 10. klasse og håper du har høve til å ta del. Ved å svare på spørsmåla vil du gi oss god oversikt over område der vi bør bli betre.

Spørjeskjemaet og ein frankert svarkonvolutt ligg ved dette brevet som er sendt alle foreldre til elevar frå 5. til 10. klasse. På spørjeskjemaet er det eit passord som skal brukast éin gong. Du kan gå inn på Internett på adressa www.bedrekommune.no og logga deg på med dette passordet og svare på brukarundersøkinga.

Du kan òg sende skjemaet i lukka konvolutt til skulen innan den 24.november.  Alle svara blir behandla anonymt.

Dersom du har nokre spørsmål om undersøkinga, må du gjerne kontakte rektor, tlf. 53758522

Mange av elevane ved skolen skal også vere med på undersøkinga. Dei får eit eige spørjeskjema som dei skal fylle ut medan dei er på skolen.

Det er sjølvsagt frivillig om ein ønskjer å vere med på undersøkinga, men vi håper at du på denne måten kan hjelpe oss med å laga ein betre skole.

Takk for hjelpa!
Helsing

Kjell Ingvald  Matre
Rektor

Skulen om lag 100 års praksis fattigare (29.09.04) 
  Personalet takkar Inger, Njål og Olav for til saman om lag 100 års teneste ved skule. Mykje skuleerfaring forlet med  desse skulen. Me kjem til å savna dei, men håpar at dei vil vera flittige til å besøka oss.

 

Nye datamaskinar på plass ( 23.04.04 )
 Endeleg er dei nye datamaskinane på plass på datarommet ved skulen. Me har fått god støtte frå næringslivet i bygda og vil takka alle dei som har vore med å få dette til!  
    

Krafttak for nytt datautstyr på skulen
  Skulen sitt datarom er mykje nytta, men utstyret er mildt sagt gått ut på dato. I godt samarbeid med fleire interesserte har skulen tatt initiativ for å fornya og oppdatera dette utstyret, slik at det harmonerer med dei krav ein stiller i dag, når skulen har fått installert breiband og fleire læreverk har deler av lærestoffet lagt ut på internettet.

Sist fredag var arbeidsgruppa samla for å avslutta den første fasen i prosessen, og gjera opp status. Med alle tilsagn er me nå oppe i eit fantastisk resultat: 200.000 kroner disponerer skulen nå til å fornya innhaldet i datarommet!

Resultatet er ganske overveldande, og me på skulen er imponerte over den viljen næringslivet har synt for å vera med på å setja skulen i stand til å ikkje berre møta utfordringane av i dag, men òg dei me vil møta i morgon. Dei som har vore med og støtta, er Skånevik Næringsutvikling, Skånevik Ølen Kraftlag, Sunnhordland Mek. Verksted AS, Johansen Rør AS, Skånevik Fjordhotell AS, SpareBank1 Vest, Tungesvik Bygg AS, Spar/LR Christophersen og Ragnar Knudsen Trevarefabrikk. Stor takk til dei alle, og honnør for ei positiv haldning til skulen og Skåneviksamfunnet!

Nå vil me på skulen, i samarbeid med datafolka i Etne, sørga for å setja i verk neste punkt i planen: bestilling av utstyret. Kommunen er i ferd med å inngå ein interkommunal innkjøpsavtale om slikt utstyr, dermed ser det ut til at me nokså snart kan få godt utstyr til ein god pris.

Klassefest 10 år etter
I slutten av september hadde elevane som gjekk ut frå Skånevik skule for 10 år sidan klassefest. 9 år på Skånevik skule setter spor og gir mange gode minner. 

Paul Tungesvik var klassestyrar og viste gamleklassen sin rundt på Skånevik skule slik at ein både kunne kjenna seg igjen og få sjå korleis skulen nå ser ut. Etterpå var det god mat og mimring i kafeteriaen i Idrettshallen. Paul hevda at han hugsa svært få episodar frå åra han hadde oss. Det kan tyda på at me var så eksemplariske at det ikkje var nokon episodar å hugsa, eller at me var så håplause at han har fortrengt minnene...

Kari

.......